LAOAG CITY – Marigatan dagti health authorites iti Central Visayas a pangatoen ti bilang dagiti ubbing a mabakbakunaan kontra iti measles ken rubella (MR) gapu iti vaccine misinformation ken panagdudua dagiti sumagmamano a nagannak.
Segun iti Department of Health iti Central Visayas (DOH-7) 21.7 a porsiento laeng iti target a 630,214 nga ubbing ti nabakunaan iti measles, rubella Supplemental Immunization Activity (MR-SIA).
Nangatngato daytoy kumparar iti 15 a porsiento idi naudi a tawen, ngem adayo pay iti 95 a porsiento a target coverage a masapul tapno maadaan ti umno a proteksion ti populasion kontra iti measles.
Segun kadagiti health, official, karaman iti rason a manglapped ket ti vaccine hesitancy ken saan nga umno nga impormasion a makitkita iti social media.
Gapu iti daytoy, pappapigsaen ti Department of Health DOH-7 ti information campaigns kadagiti barangay a manggutgutigot kadagiti nagannak nga agpakonsultar kadagiti health professionals imbes nga agibasarda iti online.
