LAOAG CITY – Ginutigot ni Presidente Ferdinand “Bongbong” Marcos Jr. dagiti local government unit wenno LGU iti intero a pagilian ti naiget a panangipatungpal dagiti pagalagadan iti “no-build zone” ken dadduma pay nga addang tapno makissayan ti panaglayus ken maprotehiran dagiti komunidad kontra iti epekto ti climate change.
Basar ken ni Presidential Communications Office (PCO) Undersecretary ken Palace Press Officer Claire Castro, masapul a maipatungpal ti linteg ken liklikan ti panagpulitika no maipapan iti kinalinteg ken kinatalged dagiti umili.
Inallukoy pay ti Presidente dagiti local government units nga urnosen dagiti sakupanda, dalusan dagiti pangayusan ti danum ken siguradoen ti naurnos a panagkolektar dagiti basura ken panagbasura.
Kuna ni Castro a no saan nga ipangag dagiti pagalagadan idi, paigeten manen ti Marcos administrasion ti pannakaipatungpal dagitoy partikular dagiti adda pakainaiganna iti climate change.
Impaganetget ti Malacañang Official a saan nga mabalin a rason ti “palakasan system” tapno saan a maipatungpal a nasayaat dagiti linteg ken pagalagadan kontra iti panaglayus ken climate change.
Ginutigot pay ti Palasio ti publiko a makikaysa iti panangpatalinaed iti kadalusan ti aglawlaw ken umno a panagibasura gapu ta mabalin a maisullat dagitoy kadagiti pagayusan ti danum a mangpakaro ti panaglayus.
Innayonna nga agtultuloy ti pananggutigot ni Presidente Marcos ti publiko nga agsagana iti epekto ti climate change a maysa kadagiti rason ti nakarkaro a panawen ken panaglayus.
