LAOAG CITY – Adda ti pannakaalarma ken pannakakigtot ti kampo ni dati nga House Speaker Ferdinand Martin Romualdez iti desisyon ti Sandiganbayan nga ikkaten ni dati a Department of Public Works and Highways (DPWH) Secretary Manuel Bonoan iti kaso a plunder nga adda ti pakainaigan ti maipagarop a maanomalya a flood control projects.
Segun ken ni Atty. Ade Fajardo, legal counsel ken pannakangiwat ni Romualdez, awan ti rakurak manipod ken ni Bonoan wenno aniaman a DPWH engineer wenno opisyal a mangikonkonektar ken ni Romualdez iti iregularidad dagiti flood control project.
Inbatad ni Fajardo a makaalarma ti pannakaikkat ni Bonoan iti kaso a plunder ken graft a sangsangwen na kadwa na dagiti dadduma pay nga akusado, karaman ditoyen ni Sen. Jinggoy Estrada.
Kunana a sipud nangisayangkat ti preliminary investigation ti special panel ti Ombudsman kontra ken ni Romualdez, awan ti nagbalin nga alegasyon manipod iti siasinno man nga opisyal ti Department of Public Works and Highways a pannakainaig ti dati nga Speaker iti anomalya.
Innayon na nga awan pay ti partikular a proyekto ti Department of Public Works and Highways a dinakamat no sadinno a nakibiang wenno nagusar ti impluwensiya ni Romualdez tapno paboran ti maysa a contractor.
Gapu iti daytoy, inbatad ni Fajardo a nakakaskasdaaw no apay a mabalin nga agbali a testigo ni Bonoan kalpasan a naikkat kas akusado iti kaso.
Kabayatanna, inpetteng ni Fajardo nga awan ti “credible evidence” kontra ken ni Romualdez kalpasan nga inbabawi ti lima a maibilang a “Maleta Boys,” karaman ti kangrunaan a testigo a ni Orly Guteza, dagiti alegasyon da kontra iti dati nga Speaker.
Kuna na pay a supsuportaran daytoy ti rakurak ti 25 pay a testigo a mangkweskwestyunar kadagiti immunan nga alegasyo ti 18 “Maleta Boys.”
