LAOAG CITY – Inpetteng ti Department of Justice a dimmalan ti naiget a deliberasion ti inpresentarda a ‘budget proposal’ para iti tawen 2027.
Basar ken ni Justice Undersecretary Ian Norman Dato a dimmalan iti panangtingiting ti nadakamat a pondo ti ahensia.
Partikular iti gakat a budget para iti ‘confidential funds’ ti ahensia no sadinno makita nga daytoy ket nababbaba kumparar ita a tawen ken idi 2025.
Mainaig iti daytoy, P364 million laeng ti gakat a budget para inton sumaruno a tawen, nababbaba daytoy iti P700 million idi 2026 ken P1.5 billion idi 2025.
Nupay saan a nangipaay ti pananglawlawag ti opisial, inpasiguradona a maiyataday ti gakat a budget kadagiti programa ti ahensia.
Kabayatanna, ti pakabuklan a budget proposal ti Department of Justice para iti 2027 ket ngimmato no ikumparar iti nailatang a budget ita a tawen.
Nanayunan laeng daytoy ti mapatta-patta P1 billion.
Naamoan a 46.44 billion ti budget iti 2027 kabayatan a 45.5 billion ti budget ita a tawen.
