LAOAG CITY – Inaprubaranen ti Senado iti maika-tallo ken maudi a panagbasa ti rakurak a linteg a mangipawpawil kadagiti kabagyan dagiti sumagmamano nga opisial ti gobierno kadagiti kontrata ken procurement ti gobierno.
Iti salinong ti Senate Bill No. 1962 wenno ti Government Contracting and Procurement Integrity Act, babaen ti panangi-sponsor ni Senator Francis “Chiz” Escudero, saan a mabalin a sumrek iti government procurement dagiti agkalikagum iti posision ti gobierno a sakupen ti kabagyanna nga opisial agingga iti maika-uppat nga antas ti panagkinnabagyanda iti dara wenno iti babaen ti kasar.
Sakupen ti nasao a pannakaipawil ti panagala ti government contracts, subcontracting, consortium, joint venture ken kadagiti dadduma pay a katulagan para iti pannakaipatungpal dagiti proyekto ti gobierno.
Karaman kadagiti opisial a sakupen ti nasao a manamnama a linteg ket dagiti nakatugaw nga opisial iti local ken national government, secretario, undersecretary ken assistant secretary, kasta pay dagti opisial ken miembro ti government-owned and controlled corporations ken state universities and colleges.
Malaksid kadagitoy, sakupenna pay dagiti opisial ken personnel a direkta nga adda pakainaiganna iti procurement, kas kadagiti heads of procuring entities, Bids and Awards Committee members, technical working group, BAC Secretariat, project consultants ken kadagiti implementing unit.
Iti baet daytoy, karaman met kadagiti kakabagyan a sakupen ti maika-uppat nga antas ket dagiti nagannak, annak, kakabsat, lolo, lola, tito, tita, kaanakan ken kadagiti first cousins, pakairamanan pay dagiti kakabagyan babaen iti kasar wenno dagiti ampon.
Mainaig iti daytoy, kalikagum ti nasao a rakurak a maliklikan dagiti possible a paggapuan ti korapsion ken panagtalinaed ti patas ken awan pabpaboranna a proseso iti panagusar ti pondo ti gobierno.
Kabayatanna, no mapirmaan to daytoyen kas maysa a linteg, mabalin a maibalud ti agingga tallo a tawen wenno agmulta ti saan a bumaba iti P100,000 ti siasinno man nga aglabsing, malaksid iti pannakaikkatna iti puesto.
Mabalin pay nga agsungbat dagiti aglabsing nga opisial iti panaglabsing iti salinong dagiti linteg a graft and corruption, karaman pay ti pannakabalud, multa ken perpetual disqualification wenno saanton a maka-apply iti aniaman a posision iti gobierno.
