LAOAG CITY – Nakairekord manen ti kabaroan nga ash emissions ti Bulkan Kanlaon idi malem ken iti bigat ti Setiembre 7, 2026 nga umabot iti 500 a metro ti kinangato ti dapu manipud iti crater-na daytoy.
Basar iti Philippine Institute of Volcanology and Seismology (PHIVOLCS) a nairekord ti aktibidad iti oras ti 1:09 ti bigat usar ti Lower Mananawin Observation Station (VKLM) Thermal Camera.
Ti plume ket agturong iti daya no sadinno agtultuloy a nakapokus dagiti eksperto kadagiti pagbaliwan ti bulkan.
Mainaig iti daytoy, agtalinaed nga Alert Level 2 wenno Moderate Level of Volcanic Unrest ti Bulkan Kanlaon kalpasan ti serye ti phreatic ken magmatic explosions a nagrugi idi Hunio 2024 ken nagtuloy agingga iti kallabes a bulan.
Binalakadan ti Philippine Institute of Volcanology and Seismology (PHIVOLCS) ti naiget a pannakaipawil ti panagserrek ti siasinnoman iti uppat a kilometro a radius Permanent Danger Zone (PDZ) gapu iti pangta ti biglaan a pnagputok, panagtennag dagiti bato ken panagalburuto ti makalason a gas.
Malaksid iti daytoy, binalakadan pay dagiti aviation authorities ti pannakaipawil dagiti piloto nga agpatayab ti eroplano iti asideg iti tuktok ti bulkan tapno maliklikan ti risgo ti ash clouds.
