LAOAG CITY – Namnamaen ti House prosecution team a malpas ti presentasionna daytoy iti maipagarup a nadakes a panagusar ti confidential funds ni Vice President Sara Duterte inton Mierkules, Setiembre 9.
Segun ken ni lead prosecutor Rep. Gerville Luistro nga adda laengen lima ti bilang ti nabatbati a witness ti naipa-subpoena.
Kunana a ti nabatbati a lima a witness ket da dati a Department of Education (DepEd) special disbursing officer (SDO) Edward Fajarda ken ti asawana a Department of Education (DepEd) Assistant Secretary Sunshine Charry Fajarda, Philippine Statistics Authority (PSA) Assistant National Statistician Marizza Grande, Police Maj. Jovelyn Magay ken empleaado ti Commission on Audit (COA) a ni Bresilio Sabaldan.
Trinatar iti umuna impeachment article ti nadakes a panagusar, misappropriation, ken irregular liquidation ni Duterte iti P612.5 milyon a confidential funds no sadinno P500 milyon ditoy ket iti babaen ti Office of the Vice President (OVP) ken P112.5 milyon iti babaen ti Department of Education (DepEd) idi panawen a nagserbi daytoy kas secretario agingga 2024.
