LAOAG CITY – Sinigurado ni Yeng Constantino ti saan a panagimon ti asawana a ni Victor “Yan” Asuncion iti pannakaibukitkit ti “almost” romance-na iti komediante a ni Ryan Bang.
Iti ambush interview iti media conference iti “The Voice Kids”, nasaludsod ken ni Yeng no adda marikrikna a panagimong ti mister-na iti pannakaibutaktak ti panagarem ni Ryan Bang kenkuana idi umuna a tawenda pay laeng iti showbiz ket inbatad ni Yeng a annakaawat ti asawana ken saanna nga ugali ti agimon.
Innayonna pay a no man pay saan a nasinged nga agpagayam da Victor ken Ryan, mangnamnama daytoy a dumteng to ti aldaw nga agbo-bonding-da a tallo.
Maipalagip a nangrugi ti panagsubli ti istoria ti arigna addan pannakabukel ti relasion dagiti dua kalpasan a kinantaan ni Yeng ni Ryan iti Biyaheng Bente: 20th Anniversary Concert-na idi Agosto 28 ita a tawen.
Immunan nga inistoria ni Yeng a dati a crush-na ni Ryan, ngem napaay daytoy idi insardeng ni Ryan iti panagaremna kenkuana.
Mainaig iti daytoy, inlawlawag ni Ryan a ti ammona ket saan nga interesado idi ni Yeng kenkuana ken inadmitirna a “financially incapable” daytoy idi inaremna ni Yeng.
