LAOAG CITY – Naglikudan ni Mr. Oscar Gamiao, school head iti Pulangui Elementary School iti ili ti Bacarra ti alegasyon a maipagarop nga isuna ti mangimanmanihir ti pondo ti Parent Teacher Association (PTA).
Inlawlawag na a no adda ti maiyimplementar a proyekto ket dagiti laeng nagannak ti agsasarita maipanggep iti magastos a pondo.
Kuna na pay nga idi adda ti naiwayat a popularity contest ket nausar ti naukkon a pondo para iti pannaka-bobeda ti court iti pagadalan.
Inpaganetget ni Gamiao a no adda ti maiwayat a taripnong iti pagadalan ket awan met dagiti agrekreklamo a nagannak.
Immuna iti daytoy, adda ti naawat a reklamo iti Bombo Radyo Laoag mainaig ti maipagarop a panangimanmanihir ni Gamiao ti pondo ti Parent Teacher Association ken saanna a maipakita ti liquidation ti nakaigasgastoan ti nasao a pondo.
