LAOAG CITY – Nangipaay ti tulong ti Lokal a gobierno ti Badoc para kadagiti mannalon a naapektaran iti habagat wenno Southwest Monsoon.
Impakaammo ni Mayor Virgilio Calajate nga agtultuloy latta ti ipapaayda a tulong iti baet ti napasaran dagiti mannalon nga epekto ti habagat.
Kunana nga adda dagiti nasapa a nagmula ti lasona a dagitoy ti kangrunaan a naapektaran gapu ta ado dagiti nadadael a mulada.
Segun kenkuana, adda dagiti saan a nakapagmula gapu iti naladaw a panagtudona no sadinno nga agkasapulan dagitoy iti danum ken adda pay dagiti dadduma a naglabes ti bunubondan.
Nupay kasta, iyur-uray manen dagiti naruay a mannalon ti tiempo a makapagmulada tapno maabrot da ti napukaw a gastos da.
Innayonna pay nga imbilinna dagiti engineers a kitaenda dagiti nadadael a kanal ken dagiti pagnaan iti danum tapno maurnos a gapu pay laeng iti nakaro a panagtudona.
