LAOAG CITY – Inrakurak ti Philippine National Police nga addan ti 26 dagiti paltog a naisuko a konektado ken ni Sen. Ronald “Bato” dela Rosa.
Daytoy ket kalpasan nga inbabawi ti Philippine National Police ti gun license ken dagiti firearm registration ti senador.
Segun ken ni PNP Public Information Office chief Col. Allen Rae Co, 20 armas ti naisuko idiay Davao idinto nga innem ti nai-turn over iti Region 4, isut gapuna nga umaboten iti 26 ti naipasidong iti nailian a pulisya.
Nupay kasta, adda ti 91 manipod iti pakabuklan a 117 firearms a nakarehistro iti nagan ni dela Rosa ti saan pay a na-account.
Agtultuloy ti pannakikoordinar ti PNP firearms and Explosives Office (FEO) iti pamilya ti Senador para iti pannakaisuko dagiti nabatbati pay a paltog ken mabalin met ti mangisayangkat ti legal a police action tapno mapasubli amin dagitoy.
Inpasigurado ti PNP nga agtultuloy pay ti operasyon da tapno mabirukan ni dela Rosa ken ipatungpal ti arrest warrant kontra kenkuana.
Saan met nga inbutaktak ti nailian a pulisya ti naudi a lokasyon ni dela Rosa gapu ta maipagarop a mabalin a maikabil iti risgo ti operasyon.
Maibasar iti kaudian nga impormasyon ti PNP, nagtalinaed paylaeng iti Pilipinas ti Senador.
Ni Dela Rosa ket maan-anop gapu iti inparuk-at nga arrest warrant ti International Criminal Court mainaig paylaeng iti crimes against humanity nga adda ti pakainaigan iti drug war idi administrasyon ni dati a Presidente Rodrigo Duterte.
