LAOAG CITY – Kinarit ni House prosecutor ken Bicol Saro Party-list Rep. Terry Ridon ni Vice President Sara Duterte a personal nga agatendar iti Senate impeachment trial ita nga aldaw ti Lunes, Setiembre 14, kabayatan ti panangrugi ti panangipresentar ti ebidensia iti Article II wenno ti alegasion ti unexplained wealth.
Segun ken ni Ridon a napateg a sumango ti Bise Presidente kabayatan nga ipresentar ti House prosecution dagiti dokumento ken testimonia mainaig iti maipagarup a baknang ti pamilia Duterte a saan a mailawlawag basar iti lawful income-da.
Iti tallo a bulan a panangusig ken 23 nga hearing dates, saan pay personal a nagatendar ni Duterte iti impeachment proceedings isu a namin-anu a kinarit daytoy dagiti prosecutor a sumango iti Senate impeachment court.
Nupay kasta, manamnama nga ipresentar ti prosecution ti sumurok 1,800 a financial documents ken testimonia ti sumagmamano a resource persons para iti Article II pakairamanan dagiti rekord nga adda pakainaiganna iti bank transaction ken dadduma pay a financial interest ti pamilia.
