LAOAG CITY – Mangnamnama ti miembro ti prosecution team a maresolbar ti uppat a pending motion kagiddan ti panangrugi ti impeachment trial kontra ken ni Vice President Sara Duterte inton bigat.
Daytoy ti inrakurak ni Manila 3rd District Rep. Joel chua, miembro ti prosecution team.
Karaman iti nasao a mosyon ti panagusar ti pagsasao a Filipino ken Ingles iti panangusig; panangipaay ti tallo nga aldaw a notice wenno abiso iti agsinnungbangir a partido sakbay nga idatag ti maysa a testigo; panangipalubos ti private ken public prosecutors a tingitingen dagiti testigo no kasapulan; ken ti panaglukat ti box a naglaon ti tax document ti bise presidente.
Malaksid iti daytoy, namnamaenda ti diskusion ti agsinnungbangir a partido iti panangresolbar kadagiti nakapenpen a mosyon.
Kabayatanna, inlawlawag ni Attorney Jay Tolosa, private prosecutor ti House Impeachment Panel a saan a nakadepende iti kadagsen dagiti ebidensia ti panagsasaruno dagiti kaso a talantanen iti Impeachment Trial ni Vice President Sara Duterte.
Innayonna nga inyunada ti Grave Threats gapu ta daytoy ti alisto a suroten ti prosecution team ken dagiti umili.
