LAOAG CITY – Impakaammo ni Dr. Medeldorf Gaoat, ti Chairman ti Committee on Health iti Sangguniang Panlalawigan, a napintas dagiti programa ti Department of Health (DOH) ken dagiti Local Government Units (LGU) a pakairamanan ti probinsia tapno malappedan ti panagngato ken ti nakaro nga epekto ti Dengue Virus kasta payen ti Leptospirosis kadagiti biktima.
Segun kenkuana, adda dagiti libre a maipapaay a bitamina kadagiti residente tapno adadda a pumigsa ti resistensia ken ti agtultuloy a pannakaipaay ti impormasion kadakuada kadagiti nasken nga aramiden tapno maliklikan ti nasao a sakit.
Iti agdama, adda ti nairekord a 1 a mortality ditoy probinsia ken adda iti pakabuklan a 1,368 a kaso ti Dengue.
Kaadoan a kaso ket ditoy siudad ti Laoag nga addaan 199 ken ti kababaan ket ti ili ti Carsi nga adda laeng 5 a kaso, idinto nga awan met iti agdama a kaso ti Dengue iti Adams.
Kabayatanna, ti met leptospirosis ket adda iti 29 a kaso idinto a nababbaba daytoy ngem idi napalabas a tawen nga adda ti 52 a kaso ken awan ti nairekord a pimmusay.
Kaadoan met ti kaso iti nasao a sakit ket iti ili ti Bacarra nga adda ti 6 a kaso.
