LAOAG CITY – Dinosdosena a tattao ti inarestar dagiti otoridad idiay Turkey kas paset ti napaigetan a kampanya ti gobierno a mangparmek kadagiti LGBTQ+ activists ken dagiti venue wenno pagguummongan da.
Naibalud dagiti naruay a demonstrador kalpasan ti panangiwayat da ti tignay protesta iti ruwar ti main courthouse iti Istanbul.
Ipanpanawagan dagiti demonstrador ti pannakawaya-waya dagiti dadduma pay a grupo ti LGBTQ+ activists, nga immunan a naarestar iti kallabes kadagiti nagsasaruno a panagraot dagiti otoridad kadagiti gay bars ken pagtaengan dagiti aktibista.
Inbalud ti Turkish government dagiti miembro ti LGBTQ+ community ken activists kas paset ti kampanya na a napaulwan ti “My Family is Safe”, a dinisenyo ti gobierno tapno maprotehiran ti family values.
