LAOAG CITY – Nagtalinaed ti takder ni Iranian President Masoud Pezeshkian a saan nga agparintumeng iti Amerika tapno agngudon ti agarop pito a bolan a gubat.
Nupay kasta, kuna na a nakasagana da iti aniaman a diplomatic solution iti nasao a gubat.
Iti panagbitla ti Iranian President iti United Nations General Assembly, inpetteng na nga ikalkalintegan da laeng ti bukod da a bagi iti panagatake nga ar-aramiden ti Estados Unidos ken Israel.
Kuna na a masapol a dagiti katulagan a maipatungpal ket naglaon ti panangpasardeng ti Estados Unidos ti pananglapped dagiti barko ti Iran nga agus-usar kadagiti kangrunaan a kabaybayan.
Inpakita pay ti Iranian President dagiti ladawan dagiti kailian na a naapektaran iti inaramid a panagatake ti Estados Unidos ken Israel.
Immunan nga inrakurak ni US President Donald Trump nga adda ti panagsarita ti Amerika ken dagiti mangibagi ti Iran tapno malpasen ti gubat.
