LAOAG CITY – Usaren ti Philippine National Police ti kanayonan a panawen tapno ad-adda a mapapigsa ti panagsaganada iti seguridad para iti sumaruno a Barangay at Sangguniang Kabataan Election (BSKE) inton Nobiembre 2028.
Segun ken ni Philippine National Police Chief Gen. Jose Melencio Nartatez Jr. a napateg nga usaren ti pannakaitantan ti eleksion tapno tingitingen dagiti nagbalin nga addang ti kapulisan kadagiti napalabas eleksion ken maamoan dagiti kasapulan pay a paimbagen.
Maipalagip a pinirmaan ni Presidente Ferdinand Marcos Jr. idi kallabes ti Republic Act No. 12326 wenno ti pannakaitantan ti nadakamat nga eleksion manipud Nobiembre 2, 2026 a maisayangat inton Nobiembre 13, 2028, innem a bulan kalpasan ti Mayo 8, 2028 a presidential ken general elections.
Kuna ni Nartatez nga usaren pay ti Philippine National Police ti kanayonan a panawen tapno maisagana dagiti kamengna ken mapapigsa ti koordinasion iti Commission on Elections (COMELEC), dagiti lokal a gobierno ken dadduma pay nga ahensia.
Agserbi pay kas pangibasaran ti Philippine National Police ti napasaranna iti September 2026 Bangsamoro Autonomous Region in Muslim Mindanao (BARMM) parliamentary election nga inpapanna a nagbalin a nalinteg ken naurnos iti kadawyan.
Nupay kasta, agsagsagana payen ti Commission on Elections ti pannakalukat manen ti voter registration kabayatan ti pannakaitantan ti Barangay at Sangguniang Kabataan elections.
Inbatad ni Commission on Elections George Erwin Garcia a manamnama nga umado dagiti agparehistro, pakairamanan payen dagiti agbotos a kalikagumna nga umakar wenno mang-activate manen dagiti voter registration gapu ti ad-adda a napaot a panawen sakbay ti eleksion.
