LAOAG CITY – Inaprobaranen ti Senado iti maikadua a pannakaibasana ti gakat a mangipawil kadagiti menor de edad wenno saan pay nga agtawen ti 18 nga agusar ti social media.
Daytoy ket ti Senate Bill No. 2424 wenno Child Online Safety and Protection Act nga inisponsoran ti Senator Robinhood Padilla.
Gagem daytoy a protehiran dagiti ubbing manipud iti pisikal, mental, ken social a pannakadadael a mabalin a gapu kadagiti social media platform.
Iti babaen ti gakat, maibilang nga age-restricted social media platform ti aniaman nga electronic service a kangrunaan a gagemna a mapaalisto ti online social interaction ken mangipalubos kadagiti user nga ag-post ti content a mabalin a makita ti sabali pay.
Pakairamanan pay kadagitoy ket dagiti international a social media platform no sadinno a kasapulanda ti mangibagi kenkuada iti Pilipinas kas katulongan dagiti otoridad ti pannakaipatungpal ti nasao a gakat.
Mainaig iti daytoy, dagiti met nagannak a mangipalubos wenno manglabsing ket mabalin nga agmulta ti agingga P50,000 wenno community service ken agatendar iti digital parenting ken child safety programs.
