LAOAG CITY – Binabalaw ni Senator-Judge Raffy Tulfo ti maipagarup a panangiyuna ni Impeachment Court Spokesperson Atty. Regie Tongol iti panangibatad ti timetable mainaig iti final verdict ti korte iti impeachment case ni Vice President Sara Duterte.
Iti panagdengngeg ita nga aldaw, Oktubre 5, kwinestionaran ni Tulfo ti immuna a rakurak ni Tongol a posible nga adda final verdict iti kaso inton Disiembre 16.
Segun ken ni Tulfo, naaddaan ti impression iti publiko iti immunan a napagdesisionan ti Impeachment Court ti agbalin a resulta ti panangusig gapu iti nadakamat a rakurak.
Innayonna pay nga adda sumagmamano a kaam-ammo ken kapagayam ti timmawag kenkuana tapno saludsuden no immunan a napagdesisionan ti agbalin a resulta ti impeachment case.
Inlawlawag met ni Presiding Officer Chiz Escudero a saan nga umno ti rakurak mainaig iti verdict inton Disiembre 16.
Inlawlawagna a ti nadakamat a timetable ket nakabasar laeng iti pagkuwenta manipud iti pretrial order, no sadinno nagkiddaw ti prosecution ti 61 wenno 62 trials days kabayatan a 30 trial dates met iti defense.
Inpaganetgetna a ti pagkuwenta ket basar iti matematika ken kalendario ken saan a ti aktual a taray iti panangusig, aglalo ket adda dagiti hearing a nakanselar.
Gapu iti daytoy, kiniddaw ni Tulfo ken ni Escudero a palagipan ni Tongol ken inpettengna a saan a daytoy ti umuna a gundaway a nangiparuk-at ti spokesperson ti rakurak iti media sakbay pay daytoy a napagtutulagan dagiti senator-judge.
Kuna ni Tulfo a naunaan dagiti senator-judge kadagiti impormasion nga naiparuk-at iti media mainaig iti panangusig.
Nupay kasta, inpasigurado ni Escudero a lagipenna ti nagbalin a rakurak ni Tulfo ken aggaraw mainaig iti daytoy.
