LAOAG CITY – Inpetteng ti Beverage Industry Association of the Philippines (BIAP) a saan a solusyon iti ngumatngato nga obesity rate iti pagilian ti plano a 200 a porsiento a nayun ti excise tax dagiti nasasam-it a mainom iti babaen ti PROGRESS tax package.
Daytoy ti inbatad ni Beverage Industry Association of the Philippines President Juan Lorenzo Tañada.
Kuna na a bimmaba ti 9.25% ti konsumo dagiti nasasam-it a mainom idi 2025, ngem ngimmato latta ti 43.1% ti obesity ken overweight rate iti pagilian, basar iti datos ti Food and Nutrition Research Institute ti Department of Science and Technology.
Inpaganetget ti grupo a mangipakpakita daytoy a saan nga umdas ti buwis kas addang kontra iti obesity, idinto a sigurado a mangpangato daytoy iti presyo dagiti produkto ken makaapektar iti industriya.
Possible met a bumaba ti 27.2% ti mapastrek ti industriya apaman a madanun ti 2027 gapu ti nailungalong a nayun a buwis dagiti nasam-it a mainom.
