LAOAG CITY – Kwinestyunaran ni Senator-judge Robin Padilla no adda ti naaramid nga aniaman nga iregularidad ni dati a Presidente Rodrigo Duterte mainaig iti joint account da ken ni Vice President Sara Duterte.
Iti panagsaludsud ken ni witness Marwin Galvez, division head ti maysa a bangko, inbatad ni Padilla a saan na a makitkita a kasapulan nga iraman ti dati a presidente dagiti isyu a matratar iti impeachment trial.
Sinaludsud ni Padilla ni Galvez no adda ti nakita na nga inaramid a kalokoan ti dati a presidente basar kadagiti dokumento a naipasango iti impeachment court.
Insungbat met ti witness nga awan dagiti nakita na a kastoy a banag basar iti records.
Paset daytoy ti pannakatratar iti nasurok a P96-milyon a pondo a maipagarop a maulit-ulit nga inaramid a manager’s checks.
Inlawlawag ni Galvez a nangisyu ti manager’s check ti bangko basta naurnus ti authorization ti instruction ken umdas ti usaren a pondo.
