LAOAG CITY – Maisagsaganan ti maipila a kaso kontra kadagiti tallo nga indibidual a natiliw babaen ti naiyuswat nga illegal drug buy-bust operation ditoy siudad ti Laoag.
Sangwen dagiti suspek ti kaso a panaglabsing ti Section 5 ken Section 11 iti Article II ti RA 9165 wenno iti Comprehensive Dangerous Drugs Act of 2002 mainaig iti panaglako ken panagtagikuada ti illegal a droga.
Iti agdama, nagtalinaed dagiti suspek iti kustodiar ti Laoag City Police Station.
Maipalagip a natiliw ti tallo nga indibidual kalpasan iti naiyuswat nga illegal drug buy-bust operation iti Brgy. 13 Nuestra Señora Visitacion ditoy siudad.
Nabigbig dagiti suspek nga agtawen ti 36, lalaki, naasawaan ken maysa a technician; maysa a babai, agtawen ti 38, naasawaan, online seller, taga Brgy. Matucay, Allacapan, Cagayan ngem agdama nga agtalinaed iti Brgy. 13 ditoy siudad; ken maysa a lalaki, agtawen 34, awanan asawa, mekaniko, taga ti Brgy. 9 iti ili ti Sarrat ngem agdama nga agtalinaed iti Brgy. 49-A Darayday ditoy siudad.
Nakupiskar manipud kadagiti suspek ti 13 nga heat-sealed sachet ti mapapati a shabu, agdagsen ti 16.49 a gramo ken mapatta-patta nga agbalor ti P112,132, maysa a black rechargeable lighter, maysa a broken improvised glass tube tooter nga addaan iti residue ti mapapati a shabu, maysa nga improvised glass tube tooter nga addaan pay ti residue ti mapapati a shabu, maysa a set ti mini metallic scooper, dua a pidaso ti syringe, maysa a bassit nga stainless a kartib, pito a sachet nga addaan ti residue ti mapapati a shabu, maysa a glass tube tooter a maipagarop nga addaan ti shabu residue, maysa nga improvised wooden tong, maysa a lighter, maysa nga P1,000 genuine bill a nausar kas buy-bust money ken tallo a pidaso nga P1,000 bill ti nausar kas boodle money.
