LAOAG CITY – Posible a mangiparuk-at ti resolusion ti Senado mainaig iti panangkarit ti Chinese Embassy kadagiti agpanpanday linteg nga ideklarar a persona non grata ni Chinese Ambassador to the Philippines a ni Jing Quan gapu iti nagbalin a rakurakna kontra iti Pilipinas.
Segun ken ni Sen. Joseph Victor “JV” Ejercito, manarimaanen ti panagsasaritada iti Senado iti posibilidad ti pannakaiparuk-at ti resolusion kalpasan ti nagbalin a rakurak ti embahador a maipagarup a nalaka laeng nga abaken ti China ti Pilipinas no agaramatda ti puersa iti West Philippine Sea.
Kinuna ti Senador a nasaysayaat laengen a sukatan ti Beijing ti ambahador no kalikagumda a pagtalinaeden ti relasionda iti Pilipinas.
Inbatadna a saan a makatulong iti panagpatalinaed ti relasion ti Pilipinas ken ti China dagiti rakurak ni Quan no diketdi pakaroenna pay ti tension iti nagbaetan dagiti dua a pagilian.
