Inyistorya ni Mrs. Jessica Ramos, a residente ditoy ciudad ti Laoag ti maipagarop a panangbastos kenkuana ti driver ti nagluganan na a tricycle ditoy ciudad.
Inbatad na a naglugan iti tricycle ken agawid iti balay da manipod iti Barangay Dungtal, ngem kabayatan ti panagbiyahe da ket ditoyen a sabalin ti ibagbaga kenkuana ti driver a binigbig na iti nagan nga Inicencio “Inshiong” Domingo, mangipapasada ti tricycle nga addaan ti sidecar number aa 2183 iti Barangay 23 ditoy ciudad ti Laoag.
Inpettengna a malaksid iti panangiggem na iti luppo na ket indiyaan pay ti tricycle driver ti 2 ribo a pisos agingga iti 2,500 a pisos kasukat ti papanda iti hotel, banag a nagpungtutan na.
Inpalgak na a namin-ado a daras nga inbaga na iti tricycle driver nga addan ti asawa na ken saan pulos nga umannugot iti kayatna a mapasamak.
Inlawlawag na a saanna koma a kayat nga ipost ti napasamak kenkuana ngem agamak amangan no addan to manen ti sabali a pangaramidan daytoy ti tricycle driver, no sadinno nga amangan no dagiti estudyante wenno mismo payen a ti anakna.
Innayon na a saanna a ninamnama nga agviral ti postna gapu ta kalpasan nga inpost na daytoy ket adda dagiti nagmessage kenkuana a masapol nga ireklamo na daytoy aglalo ket adda ti naala na a video nga ebidensya na kontra iti nasao a tricycle driver.
Kuna na pay nga adda ti maysa a nagbalin a biktima ti tricycle driver a nagmessage kenkuana ngem saanna a naireklamo daytoy gapu ta saanna a naivideo nga isu koma ti natibker nga ebidensya na.
Mainaig iti daytoy, inbatad ni Ramos nga agam-ammo da metlaeng iti tricycle driver gapu ta agkakarruba da laeng, ken addan dagiti immuna a nangnangngegan na mainaig iti maipagarop a panangbasbastos na kadagiti pasahero na, isut gapuna a no ammo na nga isuna ti driver ti nagluganan na a tricycle ket saan koman a naglugan.
Inpalgakna a saanna a nalasin ti tricycle driver gapu ta nakaabungot ti lupot, ken maipagarop a daytoy ket adda iti impluwensya ti nasanger kabayatan ti panagpasada na.
Kabayatanna, naidanun metten ti new steam ti Bombo Radyo Laoag ti napasamak iti Philippine National Police – Traffic Division ditoy ciudad ti Laoag no sadinno nga inkari da a bigbigen da ti tricycle driver ken paayaban da tapno ilawlawag na ti inaramid na iti pasahero na.
