Agduma ti impormasyon nga iggem ti Department of Justice (DOJ) ken ti Department of the Interior and Local Government (DILG) mainaig ti lokasyon ti pugante a negosyante a ni Charlie “Atong” Ang.
Inbatad ni DILG Secretary Jonvic Remulla a basar iti intelligence information da ket nakaruwaren ti Pilipinas ni Ang ken maipagarop a nagusar ti “backdoor” wenno saan nga opisyal a ruta tapno makalibas iti pagilian.
Maikontra daytoy iti inbatad ni Justice Secretary Fredderick Vida nga awan pay ti opisyal a rekord ti Bureau of Immigration (BI) a mangpaneknek a nakapanawen iti Pilipinas ni Ang.
Segun ken ni Vida, saanna nga ammo no naggapwan ti report a dinakamat ni Remulla ken saan na pa a makumpirmaran ti impormasyon mainaig iti iruruwar iti pagilian ti negosyante.
Inlawlawag met ti DOJ chief a saanna a direkta a kontraen ti rakurak ni Remulla, ngem agtalinaed da a nakabasar iti opisyal nga immigration records idinto nga awan pay ti kumpirmado nga impormasyon iti ipapanaw ni Ang.
Immunan nga inbatad ni Remulla nga awan ti BI record ti legal nga ipapanaw ni Ang iti Pilipinas, ngem mamati ti DILG a nagusar daytoy ti saan nga opsyal a ruta iti iruruwar na iti Pilipinas.
Ni Ang ket agtultuloy a birbiruken dagiti otoridad gapu kadagiti kaso na a kidnapping with homicide ken kidnapping and serious illegal detention a namonganay iti panagpukaw dagiti naruay a mammallot.
