Balligi ti pannakaiyuswat ti kaunaan a Dulang Festival ditoy siudad ti Laoag.
Daytoy ket babaen ti nagballogi a gakat nga inlungalong ni Sangguniang Panlungsod Member Bjorn Lao no sadinno a maselebraran ti cultural property ti siudad.
Segun ken ni Lao, maragsakan daytoy iti balligi a pannakaiyuswat ti festival a maitampok dagiti nagduduma a klase a luto kangrunaan ti lusay ken nagduduma a klase ti insarabasab.
Mainaig iti daytoy, maragsakan ni Mrs. Mary Jane Leaño, mangidadaulo ti Laoag City Tourism Office iti siudad, gapu ta kunana nga arapaap laeng dati ni Laoag City Mayor James Bryan Alcid ti festival ngem ita ket balligin a naiyuswat.
Kunana a daytoy ket tallo nga aldaw a selebrasion no sadinno nga iti umuna nga aldaw, naisayangkat ti opening program a nakipartisiparan dagiti nagduduma a food establishments ditoy siudad ken boodle fight a naimuntar iti aglawlaw ti Laoag City Hall.
Iti maikadua nga aldaw, maitampo met ti boodle fight iti merkado publiko iti siudad no sadinno a naawagan kas taraon ti tiendaan.
Maiyuswat met iti maikatlo nga aldaw ti cookfest a gagemna nga itampok ti next generation dishes no sadinno nga addaan ti nagduduma a kategorya .
Elementary – maitampok ti lusay;
Secondary – Hibol; ken
College – bartending a maitampok manipud kadagiti nagduduma a produkto dagiti barangay iti siudad.
Inlawlawag ni Leaño a daytoy ket maiyuswat ti tunggal bulan ti Oktubre kada tawen a gagem daytoy nga ipakita ti agtultulloy a pannakapasayaat dagiti kultura, panangipakita ti kinabakang, ken panangselebrar ti kinasiasinno ti maysa a Laoagueño.
Nagyaman daytoy kadagiti amin a bumaranggay iti siudad iti kooperasion ken pannakipartisipar da tapno maipakita ti kinabaknang ti kultura dagiti Laoagueño.
Kabayatanna, impasigurado ni Sangguniang Panlungsod Member Lao ti naan-anay a pannakapapintas pay ti festival kadagiti sumarsaruno a tawen gapu ta mangilatang da ti dakdakkel a pondo para iti nasao nga aktibidad.
