LAOAG CITY – Inarestar dagiti otoridad ti Nueva Vizcaya Police Provincial Office, pakairamanan ti Sagada Municipal Police Station, ti No. 7 Regional Most Wanted Person iti Cagayan Valley iti maysa nga operasion idi Oktubre 29, 2026.
Nabigbig ti suspek a ni alyas “Jaojao,” agtawen 41, residente ti Kasibu, Nueva Vizcaya, a sumangsango iti dua a kaso ti panangrames.
Naiwayat ti panangarestar babaen ti inparuk-at ti Regional Trial Court Branch 30 iti Bambang, Nueva Vizcaya ti warrant of arrest nga awan ti nairekomendar a piansana.
Basar iti imbestigasion, namunganay dagiti dua a kaso iti nagsina nga insidente ti maipagarup a panangramesna iti maysa nga agtawen 18 a kabagyan ti suspek idi Marso ken Abril idi naudi a tawen iti Nueva Vizcaya, no sadinno a pinangtaan ti suspek ti biktima kabayatan ti panangramesna.
Kabayatanna, gapu iti panagbuteng ti biktima iti nagbalin a panagpangta ti suspek kenkuana, immabot iti maysa a tawen sakbayna nga inpulong kadagiti nagannakna ti insidente, a nagbalin a rason tapno mai-report ti nasao nga insidente kadagiti otoridad para iti pannakaipila ti reklamo para iti nasao a suspek.
