LAOAG CITY – Inaprubaran ti United ti panangilakona ti 500 PAC-3 Patriot interceptor missiles nga aggatad ti $2.1 billion tapno matulongan ti Ukraine kontra iti kumarkaro nga aerial attacks ti Russia.
Segun iti United States Department, pondoan ti kapartido ti Kyiv iti Europa ken Canada ti nasao a pananggatang ti Ukraine babaen ti JUMPSTART program ken ti Ukraine Support Loan ti European Union.
Nupay kasta, nagballaag ni Ukrainian President Volodymyr Zelensky a mabalin nga umabot pay ti sumagmamano a tawen sakbay a maipaima kadakuada dagiti munisyon gapu iti nabayag a produksionna daytoy.
Inladawan ni Zelensky nga agkasapulan ti Ukraine ti missiles iti kabiitan a panawen gapu iti manamnama a naigiget a panagatake ti Russia kadagiti energy infrastructure-da sakbay a madanonan ti panaglalamiis.
