Inbatad ni Senador Panfilo “Ping” Lacson a suportaran ti mayorya ti Senado ti inkagumaan ni Senate Finance Committee Chairperson JV Ejercito nga ikkaten iti gakat a 2027 national busget dagiti kwestionable ken posible a paggapuan ti korapsion iti alokasyon.
Kunna a nagkaysa dagiti senador iti panangtingiting iti gakat a budget tapno masigurado a maikkat dagiti alokasion a maipagarup nga awan ti umdas a pangibasaran ken posible a mausar iti pagtalkan.
Segun ken ni Lacson, saan laeng a ti panangikkat kadagiti kwestionable nga alokasion ti gagem ti panagtingiting no di ket ti panangsigurado ti transparency iti intero a proseso ti panagbukel ti national budget.
Inpettengna a rumbeng nga awan ti eksepsion iti panagtingiting kadagiti gastos ti gobierno.
Immunan nga inbaga ni Lacson a masapul nga awan ti ipalubosda ti Senado iti panangkorehir kadagiti kwestionable nga alokasion iti bersion ti gakat a budget nga inpasa ti Kamara de Representantes, pakairamanan dagiti proyekto a posible a maikonektar kadagiti indibidual nga asideg iti Presidente.
Numan pay awan ammona a miembro ti mayorya ti nangiserrek ti bukodda a proyekto a pabpaboran iti gakat a budget, inbatad ni Lacson a marikriknana ti panagkaysa dagiti kakaduana basara iti panagsaritada.
Iti tengnga ti panagtingiting iti 2027 budget, manamnama nga agbalin a napateg a banag iti Senado ti panangtudo ken panangikkat kadagiti alokasion nga awan ti umdas a rason, kagiddan ti panangilungalong ti ad-adda a silulukat ken nalawag a proseso ti panangiyalokar ti pondo ti pagilian
