Naisayangkat ti maika-lima ken maudi nga status conference ni Presidente Rodrigo Duterte iti International Criminal Court (ICC), sakbay ti pannakairugi ti panangusig iti kaso a crimes against humanity intono Nobiembre 30.
Mainaig iti daytoy, saan a personal nga agatendar ni Duterte iti panagdengngeg kalpasan a maaprobaran ti Trial Chamber III ti kiddawna a saan nga agatendar.
Nupay kasta, dagiti abogado na ti mangibagi kenkuana tapno talantanen dagiti saritaan nga adda pakainaiganna iti panagsagsagana iti panangusig.
Pakairamanan kadagiti matalantan ket ti listaan dagiti testigo ti prosecution, oras a mailatang iti pannakaidasa ti ebidensia, posible nge ebidensia a makatulong iti depensa, ken dagiti addang para iti proteksion dagiti testigo.
Nairaman pay iti agenda ti iskedyul dagiti panagdengngeg, dagiti testimonya iti babaen ti audio-visual link, ken dadduma pay a saritaan mainaig iti panangusig.
Basar iti International Criminal Court (ICC), naikeddeng a mangrugi ti panangusig intono Nobiembre 30, 2026, iti The Hague, Netherlands.
Sangoen ni Duterte ti tallo a bilang ti crimes against humanitu nga adda pakainaiganna kadagiti maipagarup a pannakapapatay ken gandat a pannakapapatay babaen ti kampanya kontra droga iti Pilipinas manipud Nobiembre 2011 agingga Marso 2019.
