Agtalinaed iti lima a tawen ti termino dagiti opisial ti barangay ken Sangguniang Kabataan (SK) kalpasan a pinatibker ti Supreme Court ti konstitusionalidad ti linteg a mangpaatiddog iti akemda.
Daytoy ket kalpasan nga inbasura ti Korte Suprema ti petision nga inpila ni election lawyer Atty. Romulo Macalintal kontra iti Republic Act No. 12326, a mang-amyendar iti dati nga uppat a tawen a termino dagiti nadutokan nga opisial ti barangay ken Sangguniang Kabataan.
Iti desision nga insurat ni Justice Rodil Zalameda, inlawlawag ti Korte a ti nadakamat a linteg ket nangikeddeng ti kinabayag nga akem dagiti opisial ken saan laeng a mangitantan iti eleksion.
Gapu iti daytoy, inton Nobiembre 2028 maisayangkat ti sumaruno a Barangay ken Sangguniang Kabataan Elections (BSKE). Kalpasan iti daytoy, maisayangkat dagiti sumarsaruno nga eleksion iti tunggal lima a tawen.
Maipalagip a pinirmaan ni Presidente Ferdinand Marcos Jr. ti Republic Act 12326 idi Setiembre 24, 2026. Iti babaen ti linteg, manipud iti uppat a tawen, agbalin a lima a tawen ti termino dagiti opisial ti barangay ken Sangguniang Kabataan, a rason a maitantan inton Nobiembre 2028 ti eleksion a naikeddeng kuma ita a Nobiembre 2026.
Mainaig iti daytoy, saan a binaybay-an ni Macalintal ti nadakamat a panagbaliw ti termino ken nangipila daytoy ti petision iti Supreme Court tapno kwstionaran ti legalidad na daytoy.
Iti petision na, kwinestionaranna ti panangipaatiddog iti termino dagiti agdama nga opisial a saan pay naisayangkat iti eleksion, nga adda pakainaiganna iti karbengan dagiti umili nga agpili dagiti lider da iti barangay ken Sangguniang Kabataan.
Kabayatanna, inbasura ti Supreme Court ti petision ni Macalintal ken pinagtalinaed ti bisa ti Republic Act 12326.
