Ginutigot ni Baguio City Mayor Benjamin Magalong ti Commission on Audit (COA) a mangisayangkat ti special audit iti nagduduma a pondo ti nasional a gobierno kalpasan a nangiparuk-at ti desision ti Korte Suprema mainaig kadagiti probision ti national budgets 2024, 2025 ken 2026.
Karaman kadagiti pondo a kalikagumna a masukimat ket ti P449.5 billion unprogrammed appropriations iti 2024 a budget ken P17.99 billion a kanayonan a pondo para iti Special Road Fund iti 2025 budget.
Inbatadna a sukimaten dagiti pondo nga inruar iti babaen dagiti probision nga indeklerar a panaglabsing iti Konstitusion iti 2026 budget.
Malaksid iti daytoy, nagpanawagan ni Magalong iti Office of the Ombudsman a mangisayangkat ti imbestigasion tapno maamoan no adda dagiti opisial a masapul nga agsungbat maiyataday iti linteg.
Kinana a napateg a masigurado a ti tunggal piso manipud iti kuarta ti pagilian ketmaus-usaran ti umno ken para iti pagsayaatan ti publiko.
Kabayatanna, inpaganetgetna a masapul a nakabasar iti ebidensia ken respetarenna iti karbengan iti due process ti aniaman nga imbestigasion.
