LAOAG CITY – Inbatad ni Rotary Club of Ilocos Norte Central President Lindon Paguirigan, a ti panagbalin a miembro ti nasao nga organisasion ket nasayaat a wagas tapno mangiburay ti parabor kadagiti agkasapolan a komunidad.
Ti nasao nga organisasion ket bukbuklen dagiti nagduduma a negosiante ken professionals nga adda ti bukodna nga akem iti komunidad.
Mainaig iti daytoy, ti Rotary Club ket maysa a non-profit ken non-government nga organisasion a rinugianan ti tallo nga agpagayam agingga dimur-as.
Inlawlawag ni Paguirigan a ti pondo nga us-usaren da kadagiti programa ken proyektoda ket manipud iti annual membership-da, sumagmamano nga income generating project ken donasion.
Iti agdama, adda ti sagsaganaan da nga iyuswat manen nga outreach iti Maipalig-Quiom Elementary School iti paset ti Barangay Maipalig iti siudad ti Batac.
Segun ken ni Julia Divina Martin, ti immediate President ti organisasion, maiyuswat ti nasao nga outreach program intono Biernes, Nobiembre 13, 2026.
Maiyuswat dagiti agtibidad kas koma ti panagidonar ti nagduduma a libro, check-up kadagiti ubbing, ken pannakaibunong ti hygiene kits.
Pakairamanan pay ditoy ti panangipaadal da kadagiti ubbing iti anti-bullying, family nutrition, ken ti pakasaritaan ti panangsalimetmet wenno panagurnong ti kwarta no sadinno a maipaayanda pay ti piggy-bank tapno mainspiraranda nga iyaplikar ti inadalda.
