Mangnamnama ni Senador Francis “Chiz” Escudero a malpas sakbay ti paskua ti impeachment trial ni Vice President Sara Duterte tapno saanen nga umabot pay iti 2027.
Nupay kasta, inlawlawag ni Escudero, presiding officer ti Senate impeachment court, nga awan pay ti naikeddeng a deadline para iti panagleppas ti trial.
Kuna ti senador nga agingga iti Nobyembre paylaeng ti naiparuk-at nga iskedyul ti impeachment court.
Inrakurak na a nupay maysa a testigo laeng ti naipasango iti panagdengngeg idi Lunes, namnamaen na nga al-alisto ti proseso kabayatan nga agtultuloy ti presentasyon ti depensa.
Inyarigna daytoy iti makina a nabayag iti rugina ngem in-inot a pumarpardas.
Maipanggep met iti posibilidad a makissayan dagiti testigo, kuna ni Escudero a mabalin laeng a limitaran ti impeachment court ti presentasyon no maulit-ulit ken awan ti pakainaigan iti kaso dagiti ebidensya.
Innayon na a napinpintas no malpas ti trial tapno makarugi ti pagilian ti baro a chapter ti 2027 ken matutukan ti dadduma pay a karit.
