LAOAG CITY – Sinelebraran ti Bureau of Jail Management and Penology (BJMP) ti National Children’s Month ditoy siudad ti Laoag.
Segun ken ni Jail Senior Inspector Shiela Marie Sapaden a daytoy ket nakipagpasetan ti annak dagiti Persons Deprived of Liberty (PDL).
Inbatad na nga adda dagiti inyuswat da nga aktibidad para kadagiti ubbing a kas koma ti coloring, story-telling, parlor games, ken lectures.
Mainaig iti daytoy, naipaayan ti pammigbig dagiti ubbing a nalaing nga ag-color ken nalaing nga ag-estoria.
Inlawlawag ni Sapaden a saan laeng a ti Children’s Month ti panangipaayda ti tulong kadagiti ubbing no diket nagbalinen a paset ti binolan nga aktibidad da.
Mangisayangkat da pay ti aktibidad kas ti feeding program iti ruar ti pagbalodan wenno kadagiti nagduduma a pagadalan kas panangtulong da kadagiti ubbing iti benneg ti salun-at.
Innayon ni Sapaden a tumultulong pay dagiti balod a mangisagana kadagiti ipaayda iti feeding program a mangipasimudaag a dagitoy ket adda nasayaat a kalikagomda ti panangtulong da ti pada da a tao kangrunaan kadagiti ubbing.
Kabayatanna, maragsakan ni Sapaden a iti agtultuloy a panangipaayda ti ragsak ken rag-o kadagiti ubbing ken ti pannakitinnulong dagiti balod a mangaramid kadaytoy.
