LAOAG CITY – Inbatad dagiti eksperto iti salun-at a ti regular a panagpakonsultar ket makatulong iti panangprotehir iti salun-at dagiti senior pakairamanan iti panagusarda ti agas ken dagiti side effects-na aglalo kadagiti makapaspasar iti chronic conditions.
Inpetteng ni University of the Philippines – Philippine General Hospital Clinical Associate Professor Marc Evans Abat a ti lima wenno nasursurok pay a medikasion wenno ti makunkuna a polypharmacy ket saan a narisgo no umno dagiti agas, nasayaat ti pannakausarna ken agpayso a mabenipisiaran dagiti pasiente.
Inpettengna pay a masapol ti umno a preskripsion, no sadinno a ti panagpakonsultar iti nagduduma a doktor ket mabalin a mangitunda ti agduduma a diagnosis aglalo no saanda nga ammo dagiti dadduma a prescripsion dagiti immuna a nagpakonsultaran ti pasiente.
