LAOAG CITY – Immaboten iti P10.44 billion ti pakabuklan ti gatad ti nadadael ken pannakalugi a nairekord ti Department of Agriculture (DA) iti sektor ti agrikultura gapu iti nakaro nga epekto ti El Niño.
Adda iti nasurok a 338,000 a mannalon ken mangngalap ti nakaro a naapektaran gapu iti tikag ken nasurok met a 332,000 nga ektaria a pagtatalunan ti nadadael a namulaan iti pagay, mais, balanghoy, high value crops, pakairamanan dagiti taraken nga ayup.
Gapu iti daytoy, nangipatulod ti ahensia ti P18.64 billion a tulong kadagiti naapektaran a sektor iti babaen ti pinansial nga ayuda, dagiti bin-i, abono ken crop insurance.
Basar iti PAG-ASA, manamnama nga agpaot ti nakaro nga El Niño agingga iti umuna a paset ti 2027 ken possible nga umabot iti kangatoan wenno kakaroan a lebel daytoy sakbay nga agngudo ti agdama a tawen.
Nupay kasta, inpasigurado ti Department of Agriculture nga agtalinaed a nakapukos da iti situasion tapno bantayan ti kalawa ti nadadael ken siguradoen nga umdas ti suplay ti taraon kabayatan nga agtultuloy ti nakaro a tikag.












