LAOAG CITY – Inlawlawag ni Acting Barangay Captain Carmina Tagavilla iti Brgy. 2 iti ili ti Pasuquin nu apay nga awan ti kapitan da nga ABC president pay iti nasao nga ili.
Segun ken ni Tagavilla, Hulyo idi nagpakada ti ABC President nga agleave tapno mapan iti estados unidos.
Gapu iti daytoy, adda met dagiti dokumento nga inpasa da iti biang ti DILG tapno isuna pay laeng ti temporaryo nga agakem kas kapitan iti Brgy.2.
Inbatad na a maipagarup nga innem a bolan ti naipakada a panagleave na ngem maipagarup a nairana a nagsakit ken nadanunan ti lockdown isut gapu na a naitantan ti panagsubli ti ABC president ditoy pagilyan.
Kabayatanna, iti innuman ti Bombo Radyo kenni Ms. Flora Mae Agbayani, ti mangidadaulo ti Municipal Local Government Operations Officer, kuna na a Hulyo 17 agingga iti Oktubre 17 ti ummuna nga inpila ti ABC President a panagleave na.
Nu pay kasta, inbatad na nga idi Oktubre 18, 2019 ket nakaawat da manen ti leave form a naggapo iti opisina ti mayor ken mangibagbag a maiyalud-od ti leave ti ABC Presidente iti agingga January 18, 2020.
Kalpasan na ket adda man ti simmaruno a naipasa a leave form nu sadino a maiyalud-od manen ti leave ti ABC President iti Enero 19 agingga iti Pebrero 17 iti daytoy a tawen ken napasarunuan metlaeng ti leave form a napetsaan ti Pebrero 18 agingga iti April 30, 2020.
Kabayatanna, iti kaudian a naipasa a leave form ti nasao nga ABC presidente idi Nobiembre 27, nakailanad a maiyalud-od ti leave na agingga Disyembre 31, 2020.
Immunan nga adda ti naipadanon nga impormasyon iti Bombo Radyo nu sadino a maipagarup a nasuroken a maysa a tawen nga awan ti ABC President iti nasao nga ili.
Kabayatanna, inpakaammo ti DILG province a naipadanon kadakudad iti daytoy a banag ken anaipasa metten ti reklamo kontra iti ABC President iti higher office.
Agpapan a maisusurat daytoy a damag ket awan met pay ti reaksyon ti Mayor iti nasao nga ili agsipod ta maipagarup nga adda iti Metro Manila.
