LAOAG CITY – Lappedan ti Department of Justice (DOJ) ti apela ni Sen. Jinggoy Estrada iti Sandiganbayan a palubosan daytoy a makabiahe iti ballasiw taaw iti baet ti precautionary hold departure order (PHDO) nga inyisyu kontra kenkuana ti maysa a korte idiay Manila.
Inbatad ni Justice spokesperson Polo Martinez, mamati ti Department of Justice a ti senador ket ‘flight risk’ ken nasken a saan a palubosan a makaruar ditoy pagilian.
Inlawlawagna a ti precautionary hold departure order ket mabalin laeng nga i-revoke wenno ibabawi iti babaen ti pammilin ti korte a nangiyisyu iti daytoy.
Immunan a nangipila ti Senador ti mosion iti Sandiganbayan nga agkidkiddaw ti pammalubos a makabiahe idiay Hong Kong, Macau ken Japan manipud inton Marso 31 agingga iti Abril 5.
Daytoy ket iti baet ti inyisyu ti precautionary hold departure order kontra kenkuana ti Manila Regional Trial Court (RTC) Branch 52 mainaig iti sangsangoenna a kaso ti panagkunniber gapu iti pannakairamanna iti maanomalya a flood control projects.
