LAOAG CITY – Aglako manen ti bagas ti National Food Authority kadagiti tiendaan tapno kabaelan ti amin ti gumatang ti bagas.
Daytoy ti ilungalong ni ACT-CIS Rep. Erwin Tulfo ita a lawas iti Kamara nga kakaisuna a wagas tapno maipababa ti presio ti bagas iti merkado publiko.
Inlawlawagna a tapno maipatungpal daytoy ket masapol nga ibasura ti Republic Act No. 11203 wenno ti Rice Tariffication Law.”
Basar iti nasao a linteg, maipawilen iti National Food Authority ti panangilako ti bagas imbes ket mabalin laeng nga agurnong kas buffer stock ti pagilian para iti panawen ti didigra.
Innayonna nga adu a tattao ti agbirbiruk ti nalaka a bagas banag a ti laeng National Food Authority ti makaipaay daytoy kadakuada.
