LAOAG CITY – Nagtalinaed nga umdas ti suplay ti sibuyas ditoy pagilian kageddan ti panagngato ti presio daytoy kadagiti napalabas basar iti Department of Agriculture (DA).
Inlawlawag ni Department of Agriculture Assistant Secretary for Special Concerns and Official Development Assistance ken Spokesperson Arnel De Mesa, manamnama nga agingga inton Pebrero a marikna ti naan-anay a panagbaba ti presio daytoy kadagiti tiendaan gapu kadagiti nakapenpen a sibuyas kadagiti cold-storage facilities.
Daytoy ket agbalin a sakto iti agbalin nga apit dagiti mannalon para kadagiti baro nga apit ti sibuyas nga agingga inton Marso ti peak harvest.
Inpasigurado met ni De Mesa, awan ti rason tapno ngumato ti presio ti sibuyas gapu ta uray maibos dagiti sibuyas kadagiti storage facilities ket dagus a masuktan dagiti baro nga apit.
Kabayatanna, iti kaudian a price monitoring ti ahensia kadagiti tiendaan ket agay-ayam ti presio iti P100 agingga iti P180 iti kada kilo ti nalabbaga a sibuyas kadagiti tiendaan idiay Manila.
