LAOAG CITY – Inpakaammo ni Dr. Alan Taylan, ti St. Camillus De Lellis Hospital ditoy siudad ti Laoag nga adda ti posible nga epektona ti maysa nga indibidual a nadesgrasia a naapektaran ti ulona.
Nupay kasta, kunana a nakadepende no ayanno a paset ti ulona ti naapektaran gapu iti napasaranna a desgrasia.
Inbatadna a kasapulan ti naan-anay a panagadal ken panagpakonsultar iti doktor tapno maammoan ti umiso a kondision ti maysa nga indibidual.
Inlawlawagna a nasken nga anawaen dagiti maseknan nga indibidual a makapaspasar ti trauma disorder tapno maliklikan a makadangran ti sabali a tao.
Mainaig iti daytoy, kuna ni Dr. Taylan a masapol a dumalan iti psychological ken psychiatric evaluation ti sumangsango iti nasao a sakit tapno mataming nga insigida.
Inpalgakna a dakkel ti posibilidadna nga alisto nga agpungtot ti tao a makapaspasar iti nadakamat a sakit a mabalin a makaitunda ti panangdangranna kadagiti adda iti asideg kenkuana.
Maipalagip a dinangran ti maysa a lalaki nga agtawen iti 75 ti bukudna nga ina nga agtawen iti 95 iti Brgy. Darasdas iti ili ti Solsona.
Immuna iti daytoy, sipod idi nadesgrasia ti suspek ket naapektaran ti ulona no sadino ket adda ti posibilidad a no nabartek daytoy ket agbaliw ti turong ti panunotna.
