LAOAG CITY – Addan 726 a kaso ti dengue ti nairekord ti probinsya manipd Enero agingga idi bulan ti Hulyo ita a tawen.
Daytoy ti inpakaammo ni Dr. Rogelio Balbag, ti chief of hospital iti Governor Roque Ablan Senior Memorial Hospital ditoy siudad ti Laoag.
Segun ken ni Balbag, iti ili ti Pasuquin ti kaaduan ti kaso nga umabot iti 113 dagiti nairekord a dengue cases.
Kuna na a sumaruno ditoy ti siudad ti Laoag nga addaan nairekord a 106 a kaso, 81 iti ili ti Dingras, 71 iti Bacarra, 46 iti Sarrat, 43 iti siudad ti Batac ken Marcos, 41 iti ili ti Bangui, 32 iti Solsona, 25 iti San Nicolas ken 24 Burgos.
Inpakaammo ni Balgbag nga adda met ti 21 a kaso ti nairekord iti Currimao, 15 iti Pagudpud, 13 iti Piddig, 12 iti Vintar, 10 iti Paoay, siyam iti Dumalneg, pito iti Adams ken Banna idinto nga uppat iti Pinili, dua iti Badoc ken maysa iti Carasi.
Mainaig iti daytoy, inbatad ni Balgbag a nu maikompara ti bilang ti kaso iti daytoy a tawen ket nangatngato ngem iti napalabas a tawen.
Immunan nga inpakaammo ni Balbag a manipod iti kabuklan a kaso ti dengue ditoy probinsya, maysa laeng ti natay.
Kabayatanna, inbatad ti chief of hospital nga adda ti makaanay a suplay ti agas para iti dengue ditoy probinsya ken nakasagana met amin dagiti ospital.
Gutgutiguten met ni Balgbag ti publiko nga agidonar ti dara tapno adda ti nayun a suplay ditoy probinsya iti laksid nga adda ti pondo.
