LAOAG CITY – Addan iti natalged a kondisyon ti lalaki a biktima ti desgrasya iti paset ti Barangay Cabulalaan iti ili ti Bacarra.
Binigbig ni Police Inspector Joel Corrales, deputy chief of police ti PNP-Bacarra ti biktima a ni Jeffrey Tajente a residente iti Barangay Bani iti nasao nga ili.
Segun kenni Corrales, napataray ti panagmaneho ti biktima nga agturong iti daya a direksyon idi naawanan ti kontrol iti manibela ti inturong na a motorsiklo.
Inbatad na na a ti biktima ket adda iti impluwensya ti nasanger idi napasamak ti insidente ken awan ti suot na nga helmet.
Kunana a bayat ti panagresponde da ket naitaray a dagus ti biktima iti Gov. Roque Ablan Memorial Hospital gapo iti sinagaba na a sugat ti ulo ken iti bagi na.
Mainaig iti daytoy, nagpanawagan ni Corrales iti publiko a no nakainomen ti nasanger ket saanen nga agmaneho ti anyaman a klase ti behikulo tapno maliklik iti anyaman a desgrasya.
