LAOAG CITY – Kinumpirmaran ni Police Chief Inspector Arnel Tabaog, ti chief of police iti Badoc, Ilocos Norte nga addan dagiti ipadalan da iti paraffin test seknan iti pannakapapatay ni Pancho Dagdagan, agtawen iti 56, awanan iti asawa ken residente iti Bgy. Sta Cruz Sur ti nasao nga ili.
Daytoy ket tapno maamoan no adda ti pakainaigan dagitoy iti pannakatay ni Dagdagan kalpasan a napaltu-paltugan iti met laeng nasao a lugar.
Inbatad ni Tabaog a dagiti uppat nga ipadalan da iti paraffin test ket karruba met laeng ti nasao a biktima.
Segun ken ni Tabaog, kitaen da amin nga anggulo a mabalin a rason ti nangpapatayan da ken ni Dagdagan kas iti love triangle, sanikua ken dadduma pay.
Iti agdama, inbatad ni Tabaog nga agtultuloy pay laeng ti naiget nga imbestigasyon da seknan ti napasamak a pammaltog.
