LAOAG CITY – Addan ti nasurok a 1,000 a tattao idiay Mozambique ti natay kalpasan ti saan a pannakaasikaso kadakuada a naimbag gapu ta kaadoan kadagiti health workers ket saan da pay a simrek iti trabaho ken agtultuloy ti panangiyuswat da ti tignay protesta.
Maipalagip a ti tignay protesta ket rinugyan dagiti agarop 50 ribo nga health workers, tallo a lawasen ti napalabas gapu ta kalikagom da a maipangato ti sweldo da ken ti pannakapasayaat dagiti health facilities, kasta pay dagiti mausar nga equipments.
Naamoan a kaadoan kadagiti pimmusay a pasyente ket manipod iti probinsya ti Inhambane ken Sofala.
Immunan nga inpetteng dagiti health workers nga agsubli da laeng iti trabaho da no patgan ti gobierno iti Mozambique ti kiddaw da.
Nupay kasta, nagtalinaed ti takder ti gobierno a saan da a mabalin a patgan ti kiddaw dagiti maseknan gapu ta awan ti umdas a pondo ti nadakamat a pagilian.
Mainaig iti daytoy, basar iti United States Agency for International Development (USAid), agarop 500 a tattao idiay Mozambique ti magmagna iti agarop maysa nga oras tapno agturong iti health facility ken naipagagangayem a masansan nga awan ti maited kadakuada nga agas gapu iti panagkurkurang ti suplay.
