LAOAG CITY – Ado dagiti nagannak ditoy ciudad ti Laoag a saan a mangayat a mangpabakuna kadagiti annak da nga agtutubo nga agtawen ti 12 agingga iti 17.
Daytoy ket kalpasan a naaprubaran ti pannakabakuna ti covid-19 vaccine dagiti agtutubo nga agtawen ti 12 agingga iti 17.
Inbaga ti maysa nga ina nga addaan ti anak nga agtawen ti 16, saanna a kayat a mabakunaan ti anak na gapu ta amangan no saanna a kabaelan ti agbalin nga epekto ti bakuna kontra iti covid-19.
Kuna na pay a mamati a saan a kabaelan ti anak na ti epekto ti bakuna gapu ta nakapsot ti resistensya na iti baet a maibagbaga a ti covid-19 vaccine ket pangprotehir ti salun-at kontra iti makapatay a virus.
Kabayatanna, adda met ti maysa nga ina a taga Barangay Buttong ditoy ciudad ti Laoag nga umanamong a mabakunaan dagiti annak na gapu ta patien na a daytoy ti mangprotehir kadakuada manipod iti covid-19 virus.
Innayon na nga awan ti panagbuteng na iti possible nga epekto ti bakuna kadagiti dua nga annak na nga agtawen ti 14 ken 16 gapu ta nalpasen a nabakunaan ti covid-19 vaccine.
