LAOAG CITY – Ado dagiti naistranded a lugan kalpasan ti napasamak a landslide iti national higway a paset ti Barangay Pancian iti ili ti Pagudpud.
Daytoy ti inbatad ni Barangay Kagawad Jay-Z Lagundino iti nadakamat a barangay.
Inlawlawag ni Lagundino a napasamak ti panagreggaay ti daga kabayatan ti napigsa a tudo iti nasao nga ili.
Nupay kasta, nagyaman ti barangay kagawad gapu ta awan dagiti nairana a dimmalyasat a lugan idi napasamak ti panagreggaay ti daga iti nasao a lugar.
Mainaig iti daytoy, inpakaammo ni Lagundino a dagus a nagturong dagiti empleado ti Department of Public Works and Highways (DPWH)apaman a naireport nga adda ti napasamak a landslide iti nasao a lugar .
