LAOAG CITY – Narway dagiti residente ditoy ciudad ti Laoag ti napan nagparehistro iti Comelec Office iti maudi nga aldaw a panagparehistro.
Segun ken ni Mrs. Crisanta Alejandro, Election Assistant ti Commission on Elections ditoy ciudad ti Laoag, ala sais y media pay laeng ita a bigat ket nangrugin a nakapila dagiti umili.
Inbatad na a tapno masurot latta ti health safety protocols ket 10 a katao iti kada bansada ti mabalin laeng a sumrek iti opisina.
Naamoan a basar iti nakasarsarita ti Bombo Radyo Laoag a residente, makumikom iti trabaho na isut gapo na a kadaytoy laeng maudi nga aldaw ti pannakasango na nga agparehistro.
Ummunan nga inbatad ni Atty. Julius Balbas, ti Election Officer ditoy ciudad a nasurok sangaribo dagiti nakapagparehistro iti napalpalas nga aldaw ken kaadoan kadagitoy ket dagiti agtawen ti 15 agingga iti 17.
