LAOAG CITY- Narway manen dagiti residente manipud ditoy Ilocos Norte ti nagturong idiay Metro Manila tapno umawat ti maibagbaga a maysa a milyon a pisos.
Karaman kadagiti ili nga addaan ti residente a napan idiay Manila ket manipud Pasuquin, Marcos ken Dingras.
Segun ti baket a nakasarita ti Bombo Radyo ket saan na nga ammo no anya ti ubraen da idiay Manila.
Nagkedked met dagiti dadduma a maseknan nga agsarita mainaig iti nasao a banag gapo ta maipagarop a nabilin da a lumiklik kadagiti kameng ti media.
Rumrumwar a dagiti maseknan a napan idiay Metro Manila idi rabii ket maipagarop a nagbayad ti 1200 a ribo a pisos.
Naamoan a dagiti nagturong idiay Metro Manila ken isuda met laeng dagiti napan iti kallabes iti nasao a lugar gapo ta maipagarop nga umawat da ti minilyon a pisos.
Masdaaw ni Barangay Chairman Ramon Lopez iti Barangay Elizabeth iti ili ti Marcos no apay a nagado dagiti kabarangayan na ti naallukoy a mapan idiay Metro Manila.
Daytoy ket tapno umawat ti maipagarop a maysa a milyon a pisis manipud iti maibagbaga nga illgoten wealth ti pamilya Marcos.
Segun kenni Lopez, saan na nga ammo no nudtoy a paset idiay Metro Manila ti mismo a pagturungan dagiti maseknan.
Inbatad na a saan na nga ammo no kasano ti panangallukoy dagiti maipagarop a miembro ti Guardian Angel.
Naamoan a maysa iti asawa na kadagiti nagturong idiay Metro Manila tapno umawat ti maysa a milyon a pisos.
